“Եվրատեսիլյան” պատմության մեջ մինչ օրս Հայաստանի համար լավագույն արդյունք գրանցած Սիրուշոն, որը 2008-ին իր “Քելե-քելե” երգով զբաղեցրել էր մրցույթի 4-րդ հորիզոնականը, լինելու է “Մանկական Եվրատեսիլ 2011”-ի հատուկ հյուրերից մեկը:
Համաեվրոպական մրցույթի ժամանակ երգչուհին կներկայացնի “Քելե-քելե”-ի վերամշակված տարբերակը, որի ընթացքում Սիրուշոյի հետ բեմում կլինի պարային մեծ խումբ: “Ելույթներիցս առաջ հաճախ եմ զրուցում հորս հետ: Այս անգամ նա ինձ հիշեցրեց, որ երազում էի բեմում տեսնել բերդ պարը”,- լրագրողների հետ ունեցած հանդիպման ժամանակ ասել է Սիրուշոն ու հավելել, որ հայկական պարի հետ միքսված են նաեւ ժամանակակից պարային հատվածներ: BRAVO.am-ը հետեւել է Սիրուշոյի փորձերին, որի ընթացքում արված լուսանկարները եւս ներկայացնում ենք:
“Այն, ինչ օրեր առաջ ուզում էի տեսնել իմ ելույթի ժամանակ, երեկ հասկացա, որ արդեն իրականացել է”,-ասել է երգչուհին ու հավելել, որ ամեն ինչ շատ լավ է ընթանում. “Կարեւորն այս երաժշտական մեծ տոնն է, հիանալի առիթն ու այդքան գեղեցիկ երեխաները: Եկեք փորձենք ուրախանալ դրանով եւ չփնտրենք խնդիրներ ու թերություններ: Եթե թերություններ փնտրենք, հաստատ ամեն տեղ էլ կգտնենք”:
Խոսելով փոքրիկ երգիչների մասին` Սիրուշոն նշել է, որ բոլորն էլ շատ լավն են. “Մենք պետք է բարձր ծափահարենք եւ ոգեւորենք բոլորին, այստեղ կարեւորը միասնությունն է: Այն էլ երեխաների դեպքում մենք ապացուցելու խնդիրը հաստատ չունենք”:
Պատասխանելով օտարերկրացի լրագրողների հարցերին` Սիրուշոն չի բացառել, որ հետագայում “Եվրատեսիլ”-ի շրջանակներում կներկայանա որպես կոմպոզիտոր. “Նման առաջարկներ ունեցել եմ: Անցած տարի առաջարկ էի ստացել Շվեդիայից, բայց ինչ-ինչ պատճառներով չգրեցի երգի խոսքերը: Հետագայում դա եւս չի բացառվում, քանի որ հնարավորություն կունենամ եւս մեկ անգամ ներկայացնել հայկական մշակույթը, թեկուզ այն կատարվի օտար ներկայացուցչի կողմից”:
No comments:
Post a Comment